Posted by Engineer on October 31, 2012

 

كتب الشاعر أحمد شلبي : من كسرى للأفرنج

كتبت حدوتة

ولعبت دور شطرنج

مع أحلى بنوتة

وحكيتلها عن شاب

كان له زمان كرامات

وبنت أسطورة

فى العشق والتأويل

وحكيتلها عن راجل

رفض يبيع واشترى

وطفل فى عيونه

أحزان مدينة وجيل

وحكيتلها عنى

نقطة تلاقى الممكن

بحدود المحال

وحلم أب وأم

فى ليلة شتوية

أنا اللى قاعد بغنى

فى اخر بورفؤاد

وفى نفس اللحظة ببكى

فى المنشية

أنا اللى خارج

وداخل بالجديد

وانا اللى داخل

وخارج من جديد

ناس قالوا عن ولى

لكنى ليها مريد

فلو قالولكم

ان واحد كل ليلة

بيمشى ع البحر ويغنى

يبقى أنا

لو قالولكم ان واحد

لما كل الدنيا تهرب م المطر

للبحر يهرب والنوارس

يبقى أنا

لو قالولكم ان واحد

اختفى وساب رساله بانه راجع

يبقى أنا

اللى واقف ع النواصى

بعاكس الأحلام

وأبصبص ع الحياة بمزاج

انا اللى عرفت من صغرى

امسح كلمة انا محتاج

انا الغنوة اللى مكتملتش

طيف م الماضى

وريحته فى هدمتى ساكنة

وانا البحر اللى مبيهمدش

موج مش راضى

وموجة فى الكنال ساكنة

انا الدهشة فى لمة صيف

وانا الرعشة فى برد خريف

سنين بفحت فى أيامك

عن الذكرى

وعن بكره

لا عمرى قلتلك هاتى

ولا كانلى فى يوم تصنيف

انتصارى

انتصار كل المدينة

من جيانولا

لحد أصغر قهوة بلدى

والخسارة مهما كانت

ليا وحدى

من هنا

كان اللقا وكان الفراق

كان الحنين والأشتياق

كان الكلام عنك وعن بكره وبيوت الأمس

من هنا بدأ الغروب

رحلته للشمس

والأرض شافت ضلها فى عينى

من هنا كان اللى قاللى الله ينور

واللى قاللى كلام اونطة

من هنا قررت اكمل

وانتى عارفة

يا حبيبتى

الحب

عمره

ما

يبقى

غلطة

أحمد شلبي

سبتمبر 2009