Posted by Engineer on October 31, 2012

 

كتب الشاعر محمد عبد القادر : ذكرى من الذكرى

عشقت الرملة فى اللفه

وملح المية يعشقنى

ركبت القلع والدفة

ومن دا الحب زاد شأنى

سقانا البحر ايد من ايد

ولملم فرطنا عناقيد

وعشش سقفنا غابه

وخضر بيتنا لبلابه

وكنا نعاكسه ونغازله

نطب نقب... نغمز له

وعشنا العمر من غزله

لحقنا الوزنة ف الغيطان

ماكتش الورقه لينا ميزان

ولا السماك فتح دكان

وكان بالجمبه برغوتنا

كأن الزرعة من غيطنا

عاشرنا الدهنة مبرومة

فى رصة صاجة مزحومة

ساعات نحشيها نربطها

ساعات فى الملح نخلطها

..............

ولما بتحكم السهرة

تطلب الحنجلة الخضرة

نكوم جنب قراصة

وجنب فى عضم ومصاصة

وقبل الفجر يصحوا له

عشان يصطبحوا بخلوله

ولما يروح علينا النوم

نقوم نصحى منين ما نقوم

على اصناف منادية

ما بين فايت بتمرية

وبين جلاش وخد جميل

وكان النده له مواويل

وكل الطبل كان معروف

أمير طبلة الخرشوف

من الطبلة اللى ع الكهنة

وياما العشق توهنا

وجابوا منادى يندهنا

وكل منادى له حارة

وساعة العصر طيارة

نطيرها بحبل غسيل

نرص أمواسنا جوا الديل

.............

وساعة الحرب كت تركب

وينفد منها مين يهرب

نشيل للضامه كرتونة

ونحلة تلف مسنونة

ولعب الطظة كان كارنا

ما حدش يتقنوا غيرنا

صاحبت السلك والطبلة

وياما هربت م الأبلة

وشيلت الفخ والمنيح

يلازمونى منين ما اسرح

وكم درجت من بقير

يفوت موسم والاقى الطير

على عشى القديم يخبط

بحته غزل متلخبط

................

اصيد من المية ميت بطحوش

والم اصحابى وسط الحوش

فى عز الناس ما بتقيل

تشوفنى فى وسط ميت عيل

تقول عنى كما الأراجوز

تلاقى ف جيب غطا كزوز

وجيب تانى نقى وطباشير

وأخطط جون واشيل مسامير

وأستك نبلة بيلسوع

لواحدة تكون بتتأسوع

مع واحد خشب ممروع

ولو نادى فى بطنى الجوع

لا نا مروح ولا مذاكر

لأنى برغم دا شاطر

وكان القلب له دقه

بسيطة وضفتين رقه

وكان لسه عمود النور

خشب وهدومى من دمور

ألغمط روحى فى الرملة

كمن السقا كان يملا

صفيحة المية بالمليم

ويدى لكل بيت تعاليم

عشان الملو كان بالدور

ولو مرة يفوت حنطور

تلاقينا ولا الزفة

..............

ولو واحد شايل قفة

لابد نبص ايه فيها

يا نقلبها .. يا نخفيها

وكان الطوب يضاحكنا

وكل بيوتنا مش ساكنه

شقق كت فاضية تتبخر

بمية بحر أو عنبر ..

وكان مصروفى قرش احمر

يفوت عثمان بلب اسمر

وحبة فول من اياهم

سنانى الطعم فى اخرامها

كتير ايام جميلة .. تفوت

وناس بتعيش وناس بتموت

ما حدش غنى لخلوله

وخللى لسانها يترقص

أنا غنيت لماضى وراح

وخدت سيجارة م السياح

ودقت الكستنه تفاح

وطول عمرى باعيش ذكرى

ما غيب عنها ..

فى يوم وارتاح

 

محمد عبد القادر

أكتوبر 2012