Posted by Engineer on November 01, 2012

 

كتبت الشاعرة فاتن متولي : مانيش ملاك بجناحات

ولا كنت فى يوم أميرة المستحيل

ولاقلت للشاطر حسن

عدى الجبال واخطفنى فوق ضهر القمر

ولا أتمنيت أكتر م اللى فى قلوب البشر

يومى يعدى والسلام

من غير ما اشيل للهم ليل طويل

واحمد لربى أي عيشة تكون حلال

وولادى جمبى بيزرعوا بالضحكه صبرى للجاى

دا مش كتير ولا كونى راضيه بالقليل

اكون دليل للفشل وللإتكال

أحلامنا بنشيلها بأمل تحت المخده كل ليله

تخرج معانا نلبّسها فستان الحقيقة

والوقت يسرح بالجبين يرسم حاجات

ومحتاجات..

محتاجه تحصل معجزة

لجل مايصبح حلمنا حقيقة مش قابله السكات

وارجع اكرر كلمتى

ما احناش ملايكه بجنحات

ولا كنت فى يوم أميرة المستحيل

لكن قليل أو كتير حمداه ومش ناسيه الأمل

أكيدلأحلامنا البخيلة

اللى ممكن بين يوم وليلة

تخرج برة صندوق الحكايه المستحيلة

وتكون حقيقة منورة

تطيب الجرح القديم وتدوس على كل الأهات

 

الشاعرة / فاتن متولي

نوفمبر 2012